1. »Mi je so dźens w nocy zejdźało,
zo je mi lubčička wumrěła.«

2. Seduj mi, bratřiko, konika,
seduj mi přeco wobej’ dweju.

3. Chcemoj mój jěći k Šołćicom,
chcemoj jěć do Žulic k Šołćicom.

4. Chcemoj tam tola mój wohladać,
hač je mi wěrno aby njej’.«

5. Šołćina po dwori chodźeše,
w čornej tej sukni hač do zemje.

6. »Pomhaj Bóh, pomhaj Bóh, Šołćina!
Hdźe da maš ty twoju dźowčičku?«

7. »Wone je dźensa mi runje lěto,
zo smy ju na kerchow dowjezli.«

8. Z tymaj mi čornymaj konjomaj,
z tymaj mi běłymaj šumylomaj.«

9. Hólčik tón zawróći konika,
přeco wón ćěrješe do Chrósćic.

10. Přeco wón ćěrješe do Chrósćic,
přeco wón ćěrješe na kerchow.

11. Tři mole kerchow wón wobrajtowa,
na jeje rowčku wón pozasta.

12. »Stawaj mi horje, holečo,
daj mi te moje zawdanki zas!«

13. »Horje ći stawać ja njemóžu,
zawdanki ći ja dać njebudu.

14. Ćežki mam kamjeń na wutrobi,
dróbnu mam pjeršć na wočomaj.

15. Rajtuj ty mojeji maćeri dom,
njech ći wšak wona te zawdanki da.

16. Z bantom te črije su na křini,
rubiško židźane we křini.

17. Pjeršćeń mam slěborny na porsći,
teho ty nihdy zas njeskrydnješ.

18. Dźensa pak za runje lěto,
da budźeš, luby, tež pola mje.«

19. Hólčik tón zawróći konika,
přeco wón ćěrješe k maćeri dom.

20. »Och, luba stara mi maćerka,
daj mi ty nětko te zawdanki zas.

21. Z bantom te črije su na křini,
rubiško židźane we křini.

22. Pjeršćeń ma slěborny na porsći,
teho ja nihdy zas njeskrydnu.«

23. Stara mać zawdanki dawaše,
hólčik pak žałosnje płakaše.

24. »Přečo da płačeš, ty synko mój?
Wšako maš tajkichlej holcow dosć.

25. Wjele mi rjeńšich a bohatsich,
wjele mi rjeńšich a pěknišich.«

26. »Hdyž twoju dźowku ja njeskrydnu,
da ja wo druheje njerodźu.«

27. Hólčik tón zawróći konika,
přeco wón ćěrješe k tyšerjej.

28. Přeco wón ćěrješe k tyšerjej,
dał je sej dźěłaći nowy kašć.

29. »Ja chcu tež tam być, hdźež wona je,
hdźež moja lubka najlubša je.«