1. Wowčer tam paseše zeleny hajk,
wowcy so bělachu jako tón sněh,
wowčer tam chodźeše jako tón knjez.

2. Dźěchu tam nimo njoh wjele ludźi,
wšitcy jom »Pomhaj Bóh« prajachu,
wšitcy sej kłobučki zejmowachu.

3. »Přečo sej kłobučki zejmujeće?
||: Wšako dźě žadyn ja zemjan njejsym.« :||

4. »Hdy by ty žadyn mi zemjan njebył,
w somoći, židźi ty njeby chodźił,
tresatoh kłobučka njeby nosył.«

5. »Ka’ ha da njedyrbjał rjany chodźić,
hdyž mje moja lubka tak lubo ma,
zo je tak rjenje mje zwoblěkała.«

6. »Njedawaj, njedawaj horde słowa
aby će do tórma ćisnjemy,
do teho tórma mi twerdoh jastwa.«

7. »Ja widźu, ja słyšu, mój nan tón jow dźe:
Zastaj wšak, nano mój, połsta wowcow,
wupłać mi žiwjenje z twerdoh jastwa.«

8. »Połsta su wowcow mi wjele lubše,
||: dyžli ty, syno mój, njeposłušny.« :||

9. »Ja widźu, ja słyšu, moja maćer jow dźe:
Zastaj, moja maćerka, čornej kruwje,
wupłać mi žiwjenje z twerdoh jastwa.«

10. »Čornej stej kruwje mi wjele lubšej,
||: dyžli ty, syno mój, njeposłušny.« :||

11. »Ja widźu, ja słyšu, mój bratřik jow dźe:
Zastaj, mój bratřiko, ryzy konja,
wupłać mi žiwjenje z twerdoh jastwa.«

12. »Mi je mój ryzy kóń wjele lubši,
||: dyžli ty, bratše mój, njeposłušny.« :||

13. »Ja widźu, ja słyšu, moja sotra jow dźe:
Zastaj, moja sotřička, lindyr suknju,
wupłać mi žiwjenje z twerdoh jastwa.«

14. »Lindyr je suknja mi wjele lubša,
||: dyžli ty, bratše mój, njeposłušny.« :||

15. »Ja widźu, ja słyšu, moja lubka jow dźe:
Zastaj, moja lubčička, kórarje,
wupłać mi žiwjenje z twerdoh jastwa.«

16. Lubčička kórarje zastajiła,
||: lubemu žiwjenje wupłaćiła. :||

17. Wowčerja z jastwa won wjedźechu,
||: štyrjo mu hercy tam piskachu. :||

18. Bóle ći hercy tam piskachu,
||: bóle tón wowčer tam płakaše. :||

19. »Šłaj staj tu nimo mi nan a mać,
||: njejstaj so směliłaj nan a mać. :||

20. Šłaj staj tu nimo mi bratr a sotra,
njejstaj so směliłaj bratr a sotra:
Nětk je so směliła luba lubka.«