1. Wujěł jo luby na wydu
||: z wysomnasćimi gercami. :||

2. Zwignuł se jaden sćicha wětśik,
||: luby se chopił zalewaś. :||

3. Běłe te nogi ku dnu du,
||: žołte te włysy zwjeŕcha su. :||

4. Jog’ wupytało źowcyšćo
||: na swyjim groźe wusokim. :||

5. Wiźeło jo tam, wiźeło,
||: až luby se chopi zalewaś. :||

6. »Myterka, luba myterka,
||: pśiwdajśo mě něnt na pólo hyś.« :||

7. »Ja śi tam samej hyś njepśiwdaju,
||: ty maš hyšćer młodšu šotšu.« :||

8. »Šotša źen mě tam trjebna njej’,
wyna jo wjelgin malučka,
pśi tym pak wjelgin mudručka.«

9. Běžało źěwčo na pylko,
pśišło jo k janej swětłoj wyźe,
zmakało dweju rybakowu.

10. »Rybaka, myjej rybaka,
wułojtej wej mě rybicu
ze złoteju ceslinu.«

11. Prjeni raz wynej stawištej,
wuchyśištej jej rybicu
ze złoteju ceslinu.

12. Drugi raz wynej stawištej,
||: wuchyśištej jej lubego. :||

13. Tśeśi raz wynej stawištej,
||: wuchyśištej jej dwa noža. :||

14. »Jaden ten cu ja do wydy chyśiś,
||: drugi ten cu ja do se stawiś. :||

15. Jo-li wyn wuměrał myjego dla,
||: ga cu ja wumrěś jogo dla. :||

16. Zakopśo naju gromaźe
pśi droze, pśi droze, pśi šćažce,
źož wšykne luźe mimo du.

17. Tam buźo kuždy tak rjaknuś:
||: ›Tož lažytej dwa młoźeńca, :||

18. Kenž stej wumrěłoj swyjego dla,
||: swyjich tych wěrnych lubosćow dla.‹« :||