1. Maruška w pěsačku hraješe,
||: z čerwjenym jabłučkom kuleše. :||

2. Nimo tam jědźechu fórmanjo,
||: z cuzeje zemje mi fórmanjo. :||

3. Marušku sobu tam wabjachu,
||: čerwjene jabłučko skićachu. :||

4. Maruška hłupa a njerozumna,
||: přeco so fórmanam wobrěčeć da. :||

5. Mały kusk dale tam přińdźechu
||: do Delnjej’ Hórki k’ korčmičce. :||

6. Porjedź nam, korčmarka, karan piwa,
||: karan nam piwa a karan wina. :||

7. Korčmarka karany naliwaše,
||: sama jim horje tež nošeše. :||

8. »Nimaš ty, korčmarka, žanej’ dźowki,
||: zo dyrbiš sama nam horje nosyć? :||

9. Chcemy ći Marušku předaći,
||: na piwje, na winje přepići.« :||

10. Hdyž bě so minyło sydom lět,
||: da je tam přijěł jedyn rajtar. :||

11. Korčmarka karančki naliwaše,
||: Maruška pak horje nošeše. :||

12. Rajtar tón korčmarce praješe:
»Korčmarka, moja mi korčmarka,
dźens d’riš mi z Marušku nócku dać spać!«

13. Korčmarka łóžko tam sćeleše,
||: Maruška swěčku jej swěćeše. :||

14. Přeco tak jara tam płakaše,
||: hač so jej swěčka přec hasowaše. :||

15. Hdyž bě so minyło wo poł nócki,
||: poča so rajtarik prašeći: :||

16. »Čeja ty Maruška tola sy,
||: zo mi ty zo mnu njechaš spać? :||

17. Maruška, sy da ty domjaca
||: aby sy, Maruška, słužowna? :||

18. Je da tón korčmar twój prawy nan,
||: je da ta korčmarka twoj’ prawa mać?« :||

19. »Korčmar nic njeje mój prawy nan,
||: korčmarka njeje moj’ prawa mać.« :||

20. »Čeja da, Maruška, tola ty sy?«
||: »Z cuzeje zemje Kajnfalerec dźowka.« :||

21. »Maruška sy ty Kajnfalerec dźowka,
||: da sy ty moja najmłódša sotra. :||

22. Sydom sym lětkow ja wokoł’ jězdźił,
sydom sym konjow ja zajězdźił,
nětk sym pak tule će namakał.

23. Kajki dźak budźemoj korčmarce dać?
||: Chcemoj mój nětkle jej hłójčku ćeć?« :||

24. »Z lěpšim, haj lěpšim, ty bratřiko mój!
||: Derje je wona mje skubłała. :||

25. Fórmanam je mje dźě wukupiła,
||: wšitko je dobre mje wučiła. :||

26. To nic njej’ z pjenjezami zapłaćenju,
||: z běłymaj ručkomaj dźakowanju.« :||

27. »Wočiń mi, maćerka, nowy dwór!
||: Ja sej tu wjezu moj’ njewjestu.« :||

28. »Wohladaj so na twoj’ njewjestu,
hdyž tebi wjace ja hódź njejsym.«

29. »Tole wšak njeje nic njewjesta,
||: to dźě je moja młódša sotřička.« :||

30. Stara mać nowy dwór wočinješe,
z ručkomaj Marušku witaše. :||