Serbske ludowe spěwy

Ha běštej tam, běštej tam towaršce dwě

1. Běštej tam, běštej tam towaršcy dwě,
jeneho lubeho měještej.

2. Hromadźe wěnčik jom wiještej,
hromadźe jemu jón sćeleštej.

3. Domjaca wjes’le sej spěwaše,
słužomna žałosnje płakaše.

4. »Radź mi, mój towaršo, dobru radu,
što z tymaj holcomaj činić dyrbu?«

5. »Kup jimaj hromadźe jabłóčko,
njech wonej wo tebje wukulitej.«

6. Prěni króć domjaca kuliła,
zmolom sej lubeho překuliła.

7. Druhi króć słužomna kuliła,
zmolom sej lubeho wukuliła.

8. Słužomna wjes’le sej spěwaše,
domjaca žałosnje płakaše.

9. »Mjelč wšak a njepłač mi, towarška,
wšako maš kubła a pjenjezow dosć.«

10. »Chceš-li mi lubeho wostajić,
ja chcu ći poł mojoh kubła dać.

11. Poł mojoh kubła a poł tych pjenjez,
poł mi tych pjenjez a młódsjoh bratra.«

12. »Młódseho bratra ja njecham měć,
poł mi tych pjenjez ja njerodźu.

13. Poł twojoh kubła ja njebjeru,
hdyž luboh sameho njekrydnu.«