1. Sydał je, sydał je dróbnuški ptačk
bjez dwěmaj běłymaj kamuškomaj.

2. Přilećał, přilećał wulki ptak,
prašał so dróbneho ptačatka:

3. »Što ty tu činiš, ty dróbny ptačko,
zo sej ty wjesele njezaspěwaš?«

4. »Kak chcu sej wjesele zaspěwaći,
nimam tu nikoho swojeho.

5. Njej’ tu mój nan a njej’ tu moja mać,
komu da dyrbju ja dobru nóc dać?

6. Nan je mi wumrěł dołhi čas,
maćerje sym ja pak njespóznał.

7. Maćerje sym ja pak njespóznał,
mać su złi ludźo mi sobu wzali.

8. Starši mój bratřik je na wójni,
w cuzym haj kraju mi na wójni.

9. Młódsa pak sotřička jara hłupa,
jara haj hłupa a njerozomna.

10. Hdyž ju ja pósćelu do zahrodki,
do zahrodki mi po jabłóčko,

11. Wona mi přinjese lisćičko,
lisćičko přinjese za jabłóčko.

12. Hdyž ju ja pósćelu do zahrodki,
do zahrodki mi po róžičku,

13. Wona mi přinjese hałžčičku,
hałžčičku přinjese za róžičku.«

14. »Tak so sydń pod moje křidleško,
zo ’dźemoj lećeć do cuzoh kraja,

15. Hdźež je twój stary nan zarubany,
hdźež twoja maćerka roztorhana.«