1. Jědleńki su rubali,
reblki su dźěłali,
do wóknješkow stajeli,
po nich horje łazyli.

2. Wšitko ćiše spaše,
štož w tym hrodźi běše,
hač jenož to pacholo,
kiž te hrody wach’waše.

3. »Pójdaj, pójdaj, pacholo,
hdźe tón pan z tej panju spi?«
»Na pana ja njepowěm,
ja sym jeho słužomnik.«

4. »Njechaš-li nam pójedać,
da chcemy ći hłójčku ćeć.«
»Radsjo chcu ja pójedać,
dyžli sej dać hłójčku ćeć.«

5. »W prěnjej nowej komori,
tam tón pan z tej panju spi,
w druhej nowej komori,
tam te dróbne dźěći spja.

6. W třećej nowej komori,
tam su kluče pod wjerchom,
w štwórtej nowej komori,
tam su pjenjezy pod prohom.«

7. Pana su zarubali,
panju sobu woznyli,
panju sobu woznyli,
pana su zarubali.

8. Kusk tam dale přińdźechu,
k młodej pani prajachu:
»Zwohladuj so, zwohladuj,
rjana młoda pani!

9. Zwohladuj so, zwohladuj,
powěz ty nam nětkolej:
»Njeje ći žel panika,
twojoh młodoh panika?«

10. »Přińdu-li na druhi kraj,
druhoh skrydnu panika,
hišće wjele rjeńšeho
a tež wjele pěknišoh.«

11. Kusk tam dale přińdźechu,
k młodej pani prajachu:
»Zwohladuj so, zwohladuj,
rjana młoda pani!

12. Zwohladuj so, zwohladuj,
powěz ty nam nětkolej:
Njej’ ći twojich hrodow žel,
twojich nowych hrodow žel?«

13. »Přińdu-li na druhi kraj,
druhich hrodow skrydnu tam,
druhich hrodow skrydnu tam
hišće nowšich, šikwanšich.«

14. Kusk tam dale přińdźechu,
k młodej pani prajachu:
»Zwohladuj so, zwohladuj,
rjana młoda pani.

15. Zwohladuj so, zwohladuj,
powěz ty nam nětkolej:
Njej’ ći twojich dźěći žel,
twojich dróbnych dźěćatkow?

16. »Mi njej’ mojich dźěći žel,
mojich dróbnych dźěćatkow,
štož jenož tej’ jeničkej’
Katyržinki mojeje.

17. Ta běše ta najmjeńša,
ta běše ta najrjeńša,
w kupjawcy so kupaše,
z jabłóčkom sej hraješe.

18. Tej’ je mi najbóle žel,
Katyržinki mojeje,
Katyržinki mojeje,
tej’ je mi najbóle žel.«

19. Kusk tam dale přińdźechu,
mječik z nóžnow sćahnychu,
pani hłójčku wotćachu,
přeco dale jědźechu.