1. Jank pod hajkom woraše,
Hanka jom pohanješe,
holadra, faladra,
Hanka jom pohanješe.

2. »Hanka, wjedź mi runjewon,
zo mój brózni njezmóli,
holadra, faladra,
zo mój brózni njezmóli.«

3. »Kak chcu wjesći runjewon,
hdyž maš štyri šmotawych,
holadra, faladra,
hdyž maš štyri šmotawych.

4. Prěnjej dwaj staj šmotawoj,
druhej dwaj staj klěšiwoj,
holadra, faladra,
druhej dwaj staj klěšiwoj.«

5. Jank so na to rozhněwa.
Ćisny wótku do konja,
holadra, faladra,
ćisny wótku do konja.

6. Njetrjechi ju do konja,
trjechi Hancy do suknje,
holadra, faladra,
trjechi Hancy do suknje.

7. Hanka ta so rozhněwa,
ćisny křud a wotejžku,
holadra, faladra,
ćisny křud a wotejžku.

8. Běžała je wot Janka,
naběžała korčmičku,
holadra, faladra,
naběžała korčmičku.

9. Zašła je do korčmički,
přeco runje do jstwy nutř,
holadra, faladra,
přeco runje do jstwy nutř.

10. Tři tam blida hrajachu,
Hanku sobu wabjachu,
holadra, faladra,
Hanku sobu wabjachu.

11. Prěni króć Hanka zejhrała,
blido zemjankow dobyła,
holadra, faladra,
blido zemjankow dobyła.

12. Druhi króć Hanka zejhrała,
blido rajtarjow dobyła,
holadra, faladra,
blido rajtarjow dobyła.

13. Třeći króć Hanka zejhrała,
pólskoh krala dobyła,
holadra, faladra,
pólskoh krala dobyła.

14. Korčmarka so rozhněwa,
ćisny kluče wo blida,
holadra, faladra,
ćisny kluče wo blida.

15. »Nětk bydź ty ta korčmarka,
ja chcu być ta nošerka!
Holadra, faladra,
Ja chcu być ta nošerka!«