Serbske ludowe spěwy

Tam we tym dole hłubokim

1. Tam we tym doli hłóbokim
||: steji lipa rjana, zelena. :||

2. Sydałoj tam dwaj młodej nadobnaj,
taj staj sej slubiłoj swojej być,
swojej mi lubej mandźelskej.

3. »Moja lubka, mój dyrbimoj nětk rózno hić,
||: »ja šće mam sydom lět wandrować.« :||

4. »Maš ty šće sydom lět wandrować,
||: »da chcu ći swěrna wostaći.« :||

5. Hdyž bě so minyło sydom lět,
||: a hišće štyri njedźelki. :||

6. Šła holička do zahrodki,
||: synyła so pod róžowy kerk. :||

7. Tam wona sedźo płakaše,
||: na swojoh luboh čakaše. :||

8. Nimo tam rajtował rajtarik,
tón so jeje taklej wopraša:

9. »Přečo ty płačeš holečo?
Je tebi wumrěł nan aby mać?
||: Aby maš muža lózeho?« :||

10. »Mi nic njej’ wumrěł nan aby mać,
||: muža ja nimam žaneho. :||

11. Mi je mój luby wandrował
||: a je mi slubił zaso přińć.« :||

12. »Ja sym tam wčera rajtował,
||: hdźež z druhej wón kwas měješe. :||

13. Chceš-li jom něšto prajić dać,
||: ja chcu jom swěru sobu wzać.« :||

14. »Wjele jom zboža winčuju,
||: wšitko jom dobre popřeju. :||

15. A hišće rjanu dobru nóc,
||: zo na mnje wón je zabyć móhł.« :||

16. Sćahnył je rajtar pjeršćenik,
||: ćisnył jón holčcy do klina. :||

17. Holčo tak jara płakaše,
||: hač pjeršćeń w sylzach plowaše. :||

18. Wućahnył rubiško židźane,
||: ćisnył je holčcy do klina. :||

19. »Jow maš, moja holčka, rubiško,
trěj twoje sylzy z rubiškom
a njepłakaj tak jara wjac.

20. Z tym sym će ja tak spytował,
||: hač sy mi swěrna wostała. :||

21. Dokelž mi swěrna wostała,
da dyrbiš tež nětk moja być,
moja mi luba mandźelska.«