1. Z tamnoh boka města
wulke jězorišćo,
we tym jězorišću
žadława zła waka.

2. Třinaće je ludźi
na mól zesnědała,
hišće pak so njeje
nihdy nasnědała.

3. Rjad tón dźěše wokoł’,
na kěžori zasta
na kěžori zasta,
na joh młódsej dźowcy.

4. Kěžor dźěše po měsći:
»Njej’ tu nihdźe nichtó,
njej’ tu nihdźe nichtó,
kiž by za nju dójšoł?«

5. Kěžor dźěše domoj:
»Dźowka, luba dźowka,
njej’ tu nihdźe nichtó,
kiž by za tebje dójšoł.«

6. »Wotpasaj sej, wotpasaj
swój tón pas złoćany,
zapasaj sej, zapasaj
swój tón pas dźělany.

7. Slěkaj so ty, slěkaj
swoje židźenišćo,
wobleč so ty, wobleč
swoje wołmjenišćo,

8. Zo by ty tam dójšła
k žadławej złej wacy,
k žadławej złej wacy,
k tej žałosnej smjerći.«

9. Dźowka wotpasa sej
swój tón pas złoćany,
zapasa sej, zapasa
swój tón pas dźělany.

10. Slekny so tam, slekny
swoje židźenišćo,
woblekny so, woblekny
swoje wołmjenišćo,

11. Zo by wona dójšła
k žadławej złej wacy,
k žadławej złej wacy,
k tej žałosnej smjerći.

12. Dźowka ta tam dźěše,
waka k brjohej płowaše,
waka k brjohej płowaše,
woheń ze šije sapaše.

13. Dźowka jara zawoła:
»Luby Božo z njebjes!
Luby swjaty Jurjo,
zakol ty tu waku.

14. Ja chcu tebi daći
poł tych mojich pjenjez,
poł toh nowoh města,
poł toh nowoh hrodu.«

15. »Ja nic njecham měći
poł tych twojich pjenjez,
poł toh nowoh města,
poł toh nowoh hrodu.«

16. Wón tu waku kałaše,
waka hroznje ruješe,
waka hroznje ruješe,
woheń ze šije sapaše.

17. Wzał je swjaty Jurij
za šiju złu waku,
ćahnył je ju přeco
přez to jězorišćo.

18. Wšitke małe dźěći
z wóknami won skakachu,
wšitcy stari ludźo
k pomocy jom běžachu.

19. »Dźiće, ryjće jamu
třicyći łochći šěroku,
štyrcyći łochći hłóboku,
zo b’dźemy ju zahrjebać.«

20. »Luby swjaty Jurjo,
što ha my ći damy?
Što ha my ći damy,
zo sy nam ju skóncował?«

21. »Što ha wy mi daće?
Ničo njetrjebaće,
jeno moje mjeno
swjećće do dnja sudneho.«

22. Ludźo jamu ryjachu
a cyrkwičku twarjachu,
tajku mału cyrkwičku
wo srjedźa toh města.

23. We tejlej cyrkwičcy
tajki mały wołtark,
na tymlej wołtarku
luby swjaty Jurij.