1. Nalěto se pśibliža,
wšykna ta tšawa zelena jo.

2. Wšykna ta tšawa zelena jo,
wšykne te kwětki běłe, cerwjene su.

3. Źowćo, to górśe ryjašo,
pśecej tak wjelgin tužašo.

4. »Pśec ga ty tužyš, źowcyšćo?
Jo śi twój feter a muterka gram?

5. Jo śi twój feter a muterka gram,
abo jo luby śi wótpowěźeł?«

6. »Mě njej’ mój feter a muterka gram,
teke njej’ luby mě wótpowěźeł.

7. Źinsa jo južo sedym lět,
ak luby jo zlubił zasej pśiś.

8. A buźoš ty tam wordowaś,
pśipowěź jom’ wjele towzynt raz dobrego.

9. Daśi wón na te słowa spómysli,
co mój smej něga groniłej.

10. Běłej tej ruce nawdałej,
złotne te pjeršćenje zawdałej.«

11. »Och, njewěŕ źe, njewěŕ, ty rědne źowćo.
Snaź mógu ja ten samy byś.

12. Něto dejš ty ta mója byś,
nikula žedna druga nic.«

13. Rědna ta Hana Nugliškojc,
rědny ten Mato Tšadowkojc.

14. A stej dwa rědnej, nadobnej,
wobej stej na se spódobnej.